Bərdə Rayon Təhsil Şöbəsi, Yeni Azərbaycan Partiyası Bərdə rayon təşkilatı və rayon Gənclər idarəsinin birgə təşkilatçılığı ilə məktəblilər arasında Yeni Azərbaycan Partiyasının (YAP) yaradılmasının 26-cı ildönümü münasibətilə "Nə? Harada? Nə zaman?” intellektual oyunu və mini-futbol turniri keçirilib.

              Təhsil şöbəsinin metodistləri Vüsal Quliyev və Anar Rəsulov, YAP Bərdə rayon təşkilatının əməkdaşı Fuad Ağayev, Gənclər və İdman idarəsinin rəisi vəzifəsini icra edən Aydın Qasımov çıxış edərək Yeni Azərbaycan Partiyasının yaranma tarixindən və keçdiyi şərəfli yoldan, ölkəmizdə gənclərin hərtərəfli inkişafına, təhsilə və idmana göstərilən diqqət və qayğıdan, gənc nəslin intellektual səviyyələrinin yüksəldilməsi və vətənpərvər ruhda tərbiyə olunması sahəsində görülən işlərdən danışıblar.

              Çıxışlardan sonra yarış başlanıb. Gərgin mübarizə şəraitində keçən yarışda daha yüksək intellektual oyun nümayiş etdirən şəhər 7 nömrəli tam orta məktəbin komandası birinci, 3 nömrəli tam orta məktəbin komandası ikinci, 8 nömrəli tam orta məktəbin komandası isə üçüncü yeri tutub. Mini-futbol turnirində isə Muğanlı kənd, şəhər 4 və 8 nömrəli tam orta məktəblərin komandaları müvafiq olaraq birinci, ikinci və üçüncü yerlərə layiq görülüblər.

          Qalib komandalar Yeni Azərbaycan Partiyasının təsis edilməsinin 26-cı ildönümü münasibətilə keçirilən tədbirdə müvafiq dərəcəli diplom və xatirə hədiyyələri ilə mükafatlandırılıblar.